A Consellería de Cultura, Lingua e Xuventude impulsa a restauración do retablo lateral esquerdo da igrexa de Sta María Magdalena da Seara, en Quiroga, cun orzamento de 12.039,50 € (IVE incluído). As obras comezaron este luns 19 de agosto e está previsto que rematen en menos de catro meses.

A igrexa de Sta. María Magdalena da Seara está apartada da aldea, domina desde a parte alta do leste a poboación, acentuando o seu aspecto de fortaleza. O edificio de raíces medievais presenta na actualidade amplos sectores do século XVI e reformas moito máis recentes como o morteiro de cal e area que o recubre.

O retablo da nave lateral esquerda obxecto da restauración é un pequeno altar barroco de madeira de castiñeiro, policromado e dourado. Consta de predela con portiña, corpo único, ático e tres rúas divididas por columnas salomónicas, e conserva a imaxe escultórica exenta da Virxe co Neno, que indica a súa advocación. Acomódase sobre un banco de mampostería revestida de morteiro e se apoia ao muro mediante ancoraxes de madeira e ferro.

ESTADO DE CONSERVACIÓN ACTUAL DA IGREXA

O edificio atópase nun moi deficiente estado resultado de antigas afeccións directas de humidade e calor. Amosa patoloxías tales como graves desaxustes estruturais e de ancoraxes que se traducen en perdas volumétricas, desplomes, gretas, fisuras e afeccións de insectos xilófagos. No relativo á capa pictórica, destaca o seu alarmante debilitamento, con disgregación e estendida perda de estratos polícromos. En superficie, acumulación de po e restos orgánicos. Sinalarase que a imaxe da Virxe amosa un repinte que cubre por completo a policromía orixinal.

TRABALLOS A REALIZAR

• Fixación de urxencia da policromía.
• Desmontaxe do retablo. Siglado de pezas.
• Limpeza superficial.
• Desinsectación curativa-preventiva.
• Consolidación do soporte con resinas acrílicas e/ou epoxídicas, co fin de recuperar a súa consistencia.
• Limpeza de policromías. Na imaxe da Virxe, retirarase o repinte co obxecto de recuperar, na medida do posible, a súa orixinalidade.
• Consolidación de estratos polícromos disgregados e desprendidos, preferentemente con colas orgánicas de orixe animal.
• Axustes estruturais con madeira das mesmas características ás do retablo, co fin de recuperar o equilibrio e solidez do mesmo.
• Reconstrucións volumétricas, caso de ser necesario, para recuperar a estabilidade formal e estética.
• Estucado e reintegracións cromáticas, respectando as perdas de estratos polícromos.
• Protección final, preferentemente con resinas naturais con aditivos de protección ultravioleta.
• Montaxe do retablo con illamento (da base e das ancoraxes) e saneamento ou substitución de ancoraxes.
• Redacción de memoria final da restauración.