Por Chantada – Interior Galego Vivo ten amosado sempre o seu rexeitamento á privatización do Servizo de Axuda no Fogar e ten levado a pleno distintas alternativas á xestión que facía a empresa Samaín. Despois dunha nova adxudicación a Os Ventos, aseguran que “lonxe de mellorar a situación, neste verán converteuse en catastrófica”.

Por Chantada trasladará ao pleno que a dotación e organización dos recursos é claramente deficiente desde hai meses e que no verán chegou a unha situación insostíbel, “converténdose no período estival nun servizo teledirixido, só virtualmente, desde Santiago, o que incumpre a normativa autonómica do servizo e vai en claro detrimento das familias e dos utentes do SAF», asevera a concelleira de Por Chantada, Helena Fernández, “a isto engadiuse que nalgunha quincena do verán chegou a haber 7 traballadoras de vacacións e 6 de baixa».

Segundo Helena Fernández, «é unha obviedade que o Servizo de Axuda no Fogar ten una especial prevalencia na afectación á saúde física e mental das persoas traballadoras que só se pode explicar desde o recoñecemento dunhas condicións laborais inaceptábeis na prestación dun servizo público e esencial, que debería asumir a Xunta para ter condicións iguais en todos os concellos da Galiza e pór fin ás asimetrías e o elevado cofinanciamento para os concellos e mesmo para a Deputación que destina unha parte do Plan Único para o SAF». Con todo Por Chantada quere coñecer a valoración do equipo de goberno a este respecto.