O concurso busca proxectos innovadores para desenvolver o medio rural e poñer en valor os seus recursos, tendo preferencia os vinculados co territorio Ribeira Sacra; pero o concurso sempre estivo aberto a calquera persoa física de calquera lugar do mundo que teña unha idea empresarial destas características.

Este 26 de outubro desde as 10:00h preséntanse ante o xurado no Parador de Turismo de Monforte os 10 proxectos que chegaron á final:

• ALGASLIME: microalgas vivas solidificadas que optimizan a rega e a fertilización, beneficiando tanto aos agricultores como ao medio ambiente. AlgaSlime é un produto innovador deseñado para mellorar a eficiencia do uso da auga e os nutrientes nos cultivos. Grazas ás microalgas, retense auga no chan e libéranse nutrientes lentamente, mellorando a estrutura e a saúde do chan.
• TECNOALGAE, REVALORIZACIÓN AUGAS RESIDUAIS CON MICROALGAS: Revalorizacion e aproveitamento das augas residuais mediante o cultivo industrial de microalgas. Coa implementación de raceways (depósitos para cultivo de microalgas) optimizados, aprovéitanse as augas residuais de granxas e cooperativas e transfórmase nun eficiente bioestimulante agrícola.
• GEMMA & NAZA CHEESECAKES: Produción artesanal de tortas de queixo desde o compromiso coa calidade, a sustentabilidade e o apoio á economía local. Utilízanse produtos locais e galegos de alta calidade para elaborar as tortas, garantindo frescura e autenticidade en cada bocado. Resalta os sabores tradicionais de Galicia e apoia aos agricultores e provedores da rexión.
• PIEL NATURA: Cosmética sólida ecolóxica e aromaterapia galega para o benestar. Liña de cosmética galega con extracto de castiñeiro. Innovación e creación de novas liñas de produtos, programas de formación e experiencias turísticas na Ribeira Sacra.  
• ENZICAS, ACELERADORA DE QUEIXOS E EMBUTIDOS CON CASTAÑAS: ENZICAS BIO SL, empresa cualificada como Startup por ENISA e fundada en 2022, expón o desenvolvemento dun ingrediente alimentario de orixe natural para empregar na maduración de queixos e embutidos. O ingrediente está baseado nun fungo filamentoso desenvolvido a base de castañas.
• VIÑALERT: Desenvolvemento e implementación dun sistema de monitorización continua das constantes vitais das vides, enfocado especialmente na análise dos nutrientes do solo e da planta. Datos en tempo real sobre os niveis de nutrientes, temperatura, humidade, pH e outras variables esenciais, sendo a máis innovadora de elas o análese da savia das vides, permitindo así a detección prematura de enfermidades e control exhaustivo en tempo real dos nutrientes.
• FUNGUSVID: Proponse a introdución de micorrizas arbusculares na plantación de vides. As micorrizas son fungos que establecen unha relación simbiótica coas raíces das plantas, mellorando a absorción de nutrientes e a saúde do solo sen necesidade de fertilizantes químicos. Melloran tamén a resistencia das plantas ao estrés abiótico, como a seca e as enfermidades.
• FICAR AQUÍ, PORTAL DE EMPREGO: Creación dun sitio web que recolla a oferta de emprego, que atenda as necesidades do tecido empresarial das empresas do rural galego, e poña en valor os seus recursos, chamando a atención sobre as necesidades existentes e favorecer o emprendemento. O obxectivo é conectar aos diferentes protagonistas no panorama da xeración de emprego e oportunidades de empregabilidade (Administracións, empresas e profesionais) e concentrar toda a información sobre oferta e demanda nun único portal web.
• VANETTA FOOD: Startup do sector Foodtech que nace en 2023 co obxectivo de contribuír a crear unha alimentación sostible, vexetal e cunha elevada achega protéico. Primeira fábrica de carne plant based en Galicia para ofrecer produtos que non existen no mercado, cunha orientación á canle B2B2C. Alternativa esperada na restauración actual, pratos iguais que as súas outras alternativas cárnicas.
• RESPIRO SOSTIBLE: Produción de produtos de papel ecolóxicos utilizando residuos de céspede e herba como materia prima principal. Fabricación de papel hixiénico, recambios de borradores de lousa e papel de cociña, todo iso mediante un modelo de economía circular que reduce os impactos ambientais adversos asociados á produción de papel convencional.

O fallo do xurado darase a coñecer na mesma xornada do 26 de outubro, despois da cea de aniversario que se celebrará no Parador de Turismo de Monforte. Durante a cea e gala de entrega de premios contarase coa presenza da Conselleria do Medio Rural, María José Gómez Rodríguez e das directoras territoriais da Consellería de Emprego en Lugo e Ourense, Carmen José Lopez e Marta Vázquez Guzmán, respectivamente. Acudirán tamén representantes da Deputación Provincial de Ourense, da Vicepresidencia da Deputación de Lugo e dos concellos, empresas e institucións que patrocinan e colaboran co Concurso. Destes actos participarán tamén os proxectos finalistas e con motivo da celebración do X aniversario, están invitados representantes dos proxectos gañadores en edición anteriores.

A esta X edición do Concurso de Proxectos Empresariais Semente Ribeira Sacra presentáronse 85 ideas; a maioría das ideas correspondían a xente de Galicia e do territorio Ribeira Sacra, chegando tamén propostas de León, Sevilla, Madrid, Barcelona, Las Palmas e do norte de Portugal.

A presidenta da Asociación Semente Monforte, Pilar López, destaca a calidade das ideas presentadas, “Estamos moi satisfeitos coa calidade e cantidade de ideas presentadas nesta edición de décimo aniversario. A selección das 10 ideas finalistas non foi doada e o xurado tamén terá complicado escoller o sábado as tres mellores despois das presentaciónss. Agradecer a todas as persoas implicadas no concurso, participantes, empresas colaboradoras, institucións e organismos públicos, que fan posible que cada ano axudemos a impulsar proxectos. Nesta ocasión repartimos 20.000€, 10.000€ para o primeiro clasificado, 6.0000€ para o segundo e 4.000€ para o terceiro”.