A organización traslada que a quinta edición do QuiMedo levou a Quiroga unhas 1.200 persoas, participantes que en moitos casos repetían para volver sorprenderse co espectacular traballo de ambientación realizado en cada casa e coa coidada caracterización dos actores e actrices. Ademais, tamén se puido comprobar que cada ano vai máis xente disfrazada, co cal aumenta o atractivo desta ruta do terror.
O pavillón municipal, centro neurálxico, abría as sete da tarde con festa infantil –o QuiMedoFest Infantil— e o posto da organización onde o líder de cada grupo recollía as pulseiras que lles permitían o acceso ás casas xunto co mapa do trazado que debían cumprir. Todos os nenos e nenas que acudían coas súas cabazas, vasoiras ou caldeiros decorados tiveron un pequeno agasallo.
Ás dez menos cuarto o Primeiro Tenente de Alcalde, Vicente Parra, facía a presentación do evento e a organización aproveitaba para lembrar as normas a seguir así como uns consellos para desfrutar desta festa.
Durante tres horas, tempo que permaneceron abertas as casas temáticas nun percorrido polo casco urbano e Pacios de Mondelo, cada grupo debía seguir o mapa trazado pola organización para evitar as grandes aglomeracións nas entradas. As 9 casas eran as seguintes: “Pirámide”, a “Xungla”, “O barco pirata” a “Apocalipse zombi”, a “Casa das Torturas”, a “Casa das Bruxas”, o “Cine de terror” e a “Ouija”.
Rematado o recorrido, o pavillón municipal esperaba aos atrevidos e atrevidas que completaban a roteiro co “Quimedo Fest” e a música dos DJ Mavi Krueguer e Adri Díaz Jason.
