O Concello de Sober dará por ‘inaugurado o Nadal’ o vindeiro 13 de decembro co acendido do alumeado tradicional destas datas nas principais rúas da vila, e tamén coa instalación de dous beléns.
Un dos beléns poñerase no Centro Sociocultural coas pezas de madeira doadas polo xa falecido Ruperto Álvarez e o outro, a tamaño natural e elaborado en madeira por Eugenio Linares, estará na Praza do Concello.
PROGRAMACIÓN DE ACTIVIDADES
O domingo día 15 de decembro actuará o popular Xisco Feijóo xunto co grupo local O Trícole ás 11:30 h. no Centro Sociocultural e pola tarde terá lugar no mesmo espazo o Festival de Nadal da Escola de Música de Sober.
O venres día 20 ás 12:00 h. chega ao CEIP de Sober Papá Noel e pola tarde, ás 17:30 h., a Biblioteca Municipal recibirá a visita da Apalpadora.
Chegados ao sábado 21 haberá dous concertos con panxoliñas a cargo tamén do Trícole; un deles en Sober ás 16:45 h. con continuación nos bares da localidade, e outro na igrexa de Bolmente ás 18:15 h. Pero non queda a cousa aí, musicalmente falando, porque a partires das 19:30 h. está programado o concerto de Perisic & Urquiaga. Está organizado polas Xuventudes Musicais e será no Centro Sociocultural.
O xoves 26 e o venres 27 terá lugar a Festa Infantil de Nadal no pavillón do Colexio. E este mesmo venres, unha interesante proposta musical para achegar a música moderno a todos os públicos grazas á Xingros Big Band. O concerto será no Centro Sociocultural ás 19:30 h.
Encetado xa o novo ano 2025, o xoves día 3 haberá un contacontos a cargo de María da Pontragha (17:30 h. e organizado pola MESA pola Normalización Lingüística e BPM de Sober) e Cantos de Reis a cargo do Trícole e o domingo día 5 chegarán a Sober os Reis Magos de Oriente.
O alcalde de Sober, Luis Fernández Guitián, anima a participar dun Nadal “con moitas actividades” e pensando para todas as idades.
