Dentro da programación da Rede Galega de Teatros e Auditorios, e enmarcada na programación do 8M organizada pola Concellería de Muller e Igualdade e o CIM do Concello de Monforte, chega este xoves 13 de marzo a obra As Alumnas. A cita no Edificio Multiusos de Monforte a partir das 20.15 horas.
A peza, que se levará a escena no Edificio Multiusos, está producida pola compañía Culturactiva, escrita por Paula Carballeira, dirixida por Fina Calleja e interpretada por Mónica Caamaño e Anabell Gago. A hora de comezo está fixada para as 20:15 e o prezo da entrada xeral é de 5 euros. Para desempregados, xubilados e estudantes o custe será de 3 euros.
A OBRA
As Alumnas trata sobre a figura da pedagoga galega María Barbeito e sobre como o franquismo significou un enorme retroceso na educación do Estado, especialmente para as mulleres. As dúas personaxes femininas representan dous casos concretos de mulleres no marco histórico anterior e posterior á Guerra Civil que percorren diferentes camiños e que nos levan a tocar as transformacións sociais do momento.
A peza busca facer un exercicio de reapropiación da realidade colectiva e individual para reconstruír a memoria e espazos imaxinarios da nosa comunidade.
Elvira Fontao e Rosa Lires, antigas alumnas de María Barbeito, volven atoparse na data da morte da mestra, no ano 1970. Xa son mulleres. Atrás queda a infancia, o mundo que lles abriu a mestra antes de que o Comité de Depuración a afastase do seu traballo na escola. Porén, son as dúas únicas alumnas que lle escribiron cartas contándolle o que foi das súas vidas. A través desas cartas, e da reconstrución daqueles tempos nos que eran as mellores amigas, iremos descubrindo como as decisións marcan o destino de cadaquén, e o medo, e a rebeldía.
A forma da peza parte desa pedagoxía que recolle María Barbeito de Maria Montessori ou Ovide Decroly: centros de interese, láminas ilustradas, a torre rosa, as imprentas infantís, os traballos de clase, os debuxos, a música, a observación da natureza, o coidado e o respecto polas necesidades de aprendizaxe de cada nena.
OBRA PARA PÚBLICO INFANTIL
A seguinte obra do ciclo de teatro programada no Concello de Monforte será A nena e o grilo camiño das cores da compañía Magín Blanco. Terá lugar o vindeiro domingo 16 de marzo ás 18:00 h. no Auditorio do Edificio Multiusos, con entrada gratuíta.
