O vindeiro 17 de abril, o intérprete con alma de cómico Sergio Alba, presenta na sala Patio Scala de Taboada o seu novo espectáculo: “Dous rombos… pasa para a cama!”. O propio artista dinos tamén que será ás 20:45 h. e que o aforo é limitado para que a xente non espere aos últimos días para mercar as entradas… e máis sabendo que cadra en Semana Santa. Avisados quedamos!
Sergio bota, unha vez máis, a mirada atrás para lembrar aqueles anos de felicidade da infancia pero sen esquecer que tamén houbo experiencias menos reconfortantes, aínda que estas sempre se poden e deben afrontar dende o punto de vista do humor. En palabras del, “así nace este espectáculo, coa única pretensión de asomarnos cun sorriso a aquela época na que nos mandaban para a cama poñendo dous rombos na pantalla do televisor”.
Se temos que facer unha breve sinopse, e collendo unha das respostas a esta entrevista que tedes a continuación: “Dous rombos é un espectáculo de humor baseado na narrativa, malia que a música fará tamén acto de presenza coma fío condutor”.
Un galego de Monterroso co corazón repartido entre Euskadi e Galicia?
Así é, e así será sempre. De feito, moitas partes deste texto que estreo o 17 de abril en Taboada, están inspiradas naquela infancia repartida entre o meu barrio en Portugalete, Maestro Zubeldia, e a miña querida Vilane, en Antas de Ulla.
Como prendeu en ti a paixón pola música?
Pois creo que escoitando todos aqueles vinilos que tiñan os meus pais. Nun moble, debaixo do tocadiscos, estaban mesturados discos de Andrés do Barro e Os Tamara, con clásicos do Pop e rock nacional e británico. Pasaba tardes poñendo e quitando discos.
“Son melómano e non rexeito case ningún estilo musical, malia que me gusta moito o Pop dos 60, 70 e 80”
Dende cando actúas en público? Sempre como solista?
Pois non o sei exactamente, pero fíxeno en diferentes formatos e tocando moitos paus. Son melómano e non rexeito case ningún estilo musical, malia que me gusta moito o Pop dos 60, 70 e 80.
Nos teus espectáculos predominan as versións pop dos 80-90. Considéraste un nostálxico deses anos?
Cada vez máis, e ademais, gústame facer “apoloxía do retro”. Por iso, xurde a idea de facer este texto teatral, xa que quero render con el unha homenaxe a un pasado que sempre teño moi presente.
gústame facer “apoloxía do retro”
Cómpre dicir, por se alguén non te viu en directo, que a túa posta en escena inclúe comentarios e moito humor entre versión e versión. Como definirías ti este valor diferencial á hora de facer un cover?
O humor é unha parte moi importante da miña vida. Non concibo nada sen humor, e moito menos un espectáculo, malia que sexa de música.
O teu mítico show “TDK D’90” deuche moitas ledicias, que balance fas del?
Aínda segue funcionando moi ben! Pero é certo que agora estou máis centrado noutros proxectos… A vida, non dá para máis!
Dende o 2023 compartes un novo espectáculo co músico David Taboada, ‘Colección Romántica’. Cóntanos brevemente como naceu e de que vai esta movida.
Pois estreamos en Febreiro do ano pasado e a verdade é que nos deu moitas satisfaccións. É unha viaxe marabillosa por diferentes latitudes musicais nun formato moi intimista de piano e voz. David, é inconmensurable coma músico e tamén coma persoa.
Estamos preparando novas cousas, e con moita ilusión por continuar vendo medrar ese proxecto, co que xa percorremos todas as provincias galegas.
E neste 2025 estreas outro proxecto en solitario, “Dous rombos”. Chega para deixar atrás TDK D’90?
Non. De feito, non se parecen en nada en canto a contido. Son dous conceptos totalmente diferentes. Dous rombos é un espectáculo de humor baseado na narrativa, malia que a música fará tamén acto de presenza coma fío condutor.
Con que nos atoparemos no escenario baixo este suxestivo título?
Pois, basicamente unha homenaxe a esa marabillosamente estraña época a todos os niveis, que foron os 80 e na que pasamos do analóxico ao dixital, sen darnos apenas conta.
