Esta mércores presentouse a décimo novena edición desta iniciativa, nun acto que se desenvolveu no Museo Provincial de Lugo ao que asistiron entre outros, o presidente da Asociación de Amigos do Condado de Pallares, Carlos Vázquez, a xefa do Servizo de Coordinación Cultural da Consellería de Cultura, Lingua e Xuventude en Lugo, Águeda Valín e a deputada de Cultura, Iria Castro.
O colectivo organizador pretende promover con este certame a investigación nos ámbitos da lingüística, a historia, a arte, a arqueoloxía, a antropoloxía, etnografía e folclore no territorio que conformaba o antigo Condado de Pallares, que abranguía os concellos de Guntín, Portomarín, Taboada, Chantada e Carballedo.
Os traballos poden presentarse ata o 30 de setembro. Deben ser escritos orixinais e inéditos en lingua galega, cunha extensión mínima de cen folios. O xurado emitirá o seu fallo nun acto que se celebrará o 1 de novembro e establécese un único premio dotado con 4.000 euros.
A representante autonómica felicitou á Asociación de Amigos do Mosteiro de Ferreira de Pallares por manter vivo este certame, “un proxecto referente na divulgación e posta en valor da nosa historia, do noso patrimonio e da nosa identidade cultural” e reiterou o apoio da Xunta a esta iniciativa “que dignifica a nosa cultura e promove o coñecemento da nosa terra”.
