O Consello Regulador da D.O. Ribeira Sacra amosa a súa satisfacción por contar novamente coa presenza do prestixioso crítico de viños e editor para Sudamérica e España en Vinous.com, Joaquín Hidalgo. Esta nova visita reforza o interese do crítico arxentino por unha rexión que xa o cativara o ano pasado, cando destacou a riqueza histórica, a diversidade varietal e o potencial enolóxico do territorio.
Durante a súa estadía, que comezou o pasado venres e rematará o 22 de xullo, Hidalgo participou o día 18 nunha cata técnica organizada polo Consello Regulador na que probou un total de 15 viños: 4 brancos e 11 tintos, procedentes de colleitas variadas que abranguen desde viños novos ata elaboracións en barrica e viños de garda.
JOAQUÍN HIDALGO
Con formación en Enoloxía e Xornalismo, Joaquín Hidalgo é unha figura clave do xornalismo vitivinícola no ámbito hispano, con presenza en medios especializados e na recoñecida publicación internacional Vinous.com. O seu regreso á Ribeira Sacra reforza o crecente interese pola rexión e ofrece unha oportunidade para dar visibilidade ao traballo das súas adegas.
Finalmente, desde o Consello Regulador poñen en valor esta visita pois entenden que lle dará un pulo importante “para afianzar a proxección internacional dos viños da denominación”.
