A Pobra do Brollón será a vila que acolla un pase outonal da 2ª edición de Vendaval, unha Mostra de Cinema Portugués da Ribeira Sacra promovida pola asociación ‘A Memoria é Náufraga’ e que contará nesta ocasión coa colaboración do concello anfitrión.
No pasado mes de agosto, este mesmo festival realizouse en diferentes localizacións da Ribeira Sacra, concretamente nos concellos de Sober, Sarria e Bóveda. Daquela proxectáronse un total de 17 filmes: 5 longametraxes e 12 curtas. Os nosos colaboradores de Segredos de Pantón fixéronlle unha entrevista a Tamara González, encargada da Dirección e programación do Vendaval, graduada en Comunicación Audiovisual na UPL pasando pola Escola Superior de Teatro e Cinema e pola Universidade Nova de Lisboa.
A mostra deste outono será máis reducida e terá lugar o sábado 22 de novembro na Casa da Cultura ‘Olga Novo’ ás 20:00 h. Proxectaranse catro curtametraxes: O Homem de Trás-os-Montes de Miguel Moraes Cabral (27′), Longe da Amazónia de Francisco Carvalho (18′), Kora de Cláudia Varejão (29′) e Anjo de Miguel Nunes (24′).
Tres dos catro filmes, serán mostrados en versión original subtitulada ao galego, con traducción de Héctor Pardo Álvarez (Anjo) e María Prieto (O Homem de Trás-os-Montes e Longe da Amazónia) mentres que Kora terá subtítulos en castelán.
