Segundo a subdelegada do Goberno, os Presupostos no sur da provincia “beneficiarán a máis de 30.000 pensionistas dos concellos do sur da provincia e suporán un investimento de máis de 22 millóns directos na zona para a mellora de estradas e do ferrocarril”.

Isabel Rodríguez detallou que a revalorización das pensións beneficiará a  30.615 veciños residentes nos concellos das comarcas de Lemos, Sarria, Chantada e A Ulloa. Nas partidas económicas en investimentos para a modernización das comunicacións por estrada e ferrocarril na provincia de Lugo, destacou de Adif  8,8 millóns de euros para a renovación de variantes da liña Monforte-Lugo, 5,1 millóns á electrificación da liña Monforte Lugo e outros 160.000 euros para  a Liña de Alta Velocidade Lugo-Ourense.

Ademais, Fomento reserva 422.290 euros para a A-76 na circunvalación de Monforte. Este concello contará tamén cun orzamento de 400.000 euros con destino á labores de conservación e restauración do Mosteiro San Vicente do Pino.

Na comarca de Sarria, os concellos de Paradela, Portomarín e Samos beneficiaranse dos investimentos previstos dentro do programa de intervencións en  concellos do Camiño Francés, que conta con unha partida total de 1,2 millóns de euros. Os Presupostos inclúen, tamén, 200.000 euros para rehabilitación do firme da N-540 e outros 200.000 euros con destino á N-547 para melloras nos cruces dos Camiños de Santiago