Este mércores, na rúa Cardeal de Monforte celebrouse o acto central da programación do Día Mundial contra o Cancro que organiza a Asociación Española contra o Cancro (AECC). Acompañaron a conmemoración e a lectura do manifesto o alcalde e membros do equipo de goberno, ademais de veciñas e veciños de Monforte
O Día Mundial contra o Cancro conmemórase todos os anos o 4 de febreiro. Con tal motivo, a Delegación monfortina da AECC instalou unha mesa na rúa Cardeal desde as 10.30 horas para informar sobre a campaña e facer difusión de todos os servizos que ofrecen. Así mesmo, desde o Concello de Monforte procederase a iluminar esta noite a Torre da Homenaxe coa cor verde en recordo desta data.
O Alcalde José Tomé reafirmou o compromiso “firme e constante” do seu Equipo de Goberno coa Asociación Española contra o Cancro, “xa que desenvolve unha importante labor de investigación e asesoramento en relación cunha enfermidade que, desgraciadamente, está moi estendida na nosa sociedade”. En España, hai 2,2 millóns de persoas con algún tipo de cancro e cada ano diagnostícanse case 300.000 novos casos, unha tendencia que vai á alza, debido entre outros factores ao envellecemento da poboación e aos hábitos de vida menos saudables.
