O Cine Clube do Casino Ateneo convida a unha nova proxección audiovisual de balde. Nesta ocasión, preséntase un documental sobre a especulación inmobiliaria na cidade de Lisboa, “O que vai acontecer aquí?”, e tras o visionado haberá un coloquio que moderará Tamara González, profesional do audiovisual de Pantón e impulsora na Ribeira Sacra do festival de cinema portugués ‘Vendaval’.
O QUE VAI ACONTECER AQUÍ?
De acordo co colectivo Left Hand Rotation, que produciu a longametraxe xunto con Stop Despejos e Habita, no documental é posible asistir á loita dos diversos movementos sociais que defenden o dereito a habitar en Lisboa, “nun momento de intensificación das loitas polo espazo urbano provocada pola expansión do capitalismo financeiro, que concentra a riqueza nas mans duns poucos e aumenta a desigualdade social”.
COLOQUIO CON TAMARA GONZÁLEZ
Nacida en Pantón, no ano 1987, é unha profesional do cinema e do audiovisual especializada en produción e xestión cinematográfica. Traballou en proxectos de ficción e documental estreados en festivais e circuítos culturais, e participa activamente en iniciativas de divulgación e pensamento crítico arredor do cinema. Reside en Lisboa onde desenvolve a maior parte dos seus proxectos.
Consciente das súas raíces e do potencial cultural da zona, desde 2024 coordina o VENDAVAL Mostra de Cinema Portugués Ribeira Sacra. Esta mostra prepara xa a programación do ‘Pase de Primavera’ para finais de maio, e conta con ter presenza nos concellos de Sober, Chantada, Sarria e Bóveda.
