Estas iniciativas súmanse ás alegacións presentadas por outros partidos políticos, movementos sociais como Salvamos o Malecón e moitas persoas que a nivel individual están presentando alegacións ante a CHMS. Segundo Esperta Monforte, “o proxecto é unicamente teima do alcalde que tomou a decisión de sacar adiante a ponte sen ningún informe urbanístico e medio ambiental que avalara a necesidade de levala a cabo”. Esperta Monforte considera esta obra un atentado urbanístico e medio ambiental na contorna do Malecón e no barrio de Remberde.
Aseguran que a obra vai contra a esencia do Malecón ó impor unha estrutura de 14 metros de ancho con saída á rúa Corredoira de 8 metros. “Aniquilaranse máis de 16 árbores nunha contorna única na cidade do Cabe. A ponte lava consigo unhas rampas de acceso que rematan a 3 metros de altura na entrada da pretendida ponte, fabricando un muro artificial que arruina a esencia da zona. A construción supón a deshumanización do Malecón ao roubarlle ás persoas, o espazo e a seguridade que os coches van quitar”, engaden.
Segundo Esperta Monforte séguense criterios contrarios á humanización das cidades que todos os gobernos progresistas implantan nas cidades avanzadas, “o que dá a entender que as motivacións ideolóxicas deste alcalde son moi cuestionables ao camiñar no sentido contrario, eliminando árbores, fomentando a utiización dos coches e utilizando o chapapote como consigna urbanística”. Ata este luns podíanse presentar alegacións.
