Con saída e chegada na adega Condado de Sequeiras, cuxo apoio resulta esencial para facer posible esta cita, as rutas percorreron algunhas das paisaxes máis singulares da Ribeira Sacra, na subzona de Chantada, con incursión tamén por puntos do concello do Saviñao.

Nas tres rutas de distinta dificultade e distancia: 5, 10 e 20 quilómetros, adaptadas a todo tipo de perfís e condicións físicas, pasouse por viñedos en muras, á beira do Miño e pola desembocadura do Asma. Un ano máis a celebración deportiva foi tamén un acto de afecto, de memoria, de concienciación e de promoción das actividades saudables e en comunidade.

Andaina cancro Chantada 2026/ Asociación Chantada cancro

Trala organización de cada Andaina hai un tecido de persoas, empresas e entidades que a fan posible. Nesta quinta edición, xunto a Condado de Sequeiras, sumaron o seu apoio DaVeiga – Galletas Mariñeiras, Ambulancias Calvo, Seguros Eduardo Rogina, Eurofrut, Distribuciones Calambuco, Gadis, O Remate Gráfico, Mar&Bellota, Número 13, Hotel Mogay e Velaísca, xunto á axuda por parte das institucións colaboradoras: Concello de Chantada e o voluntariado de Protección Civil. Así mesmo, a elaboración dos percorridos da ruta correu da man de Monte da Roda, que traballou arreo no deseño e sinalización dos camiños que logo desfrutaron os participantes este domingo.

Desde a asociación aseguran que a Andaina “deixou de ser hai tempo un evento exclusivamente local. Xunto aos chantadinos e chantadinas e á súa comarca, a cita atrae a persoas chegadas de puntos moi distintos de Galicia: Monforte de Lemos, A Pobra do Brollón, Sober, Lugo capital, Ourense, A Coruña, Santiago de Compostela, Rianxo, O Barco de Valdeorras, Oleiros, Vilanova de Arousa, Xinzo de Limia, Arzúa… Un goteo de participantes que chegan non só pola causa, senón tamén polo privilexio de camiñar nun dos recunchos máis fermosos da xeografía galega”.