A Confraría do Viño de Quiroga celebra o seu capítulo anual ordinario coincidindo coa cata dos viños aspirantes a participar na XXXVII Feira do Viño de Quiroga. O programa de actos para a xornada será o seguinte:
12:00 h. Reunión dos confrades na Casa do Concello de Quiroga.
12:15 h. Solemne acto de investidura da nova confrada Dna. Mª Balbina Álvarez Rodríguez, elixida pola Asemblea da Confraría do Viño de Quiroga o pasado 9 de marzo.
12:30 h. Desfile dos/das confrades dende a Casa do Concello ata a sala de catas do Museo Etnográfico de Quiroga.
13:00 h. Cata dos viños aspirantes á XXXVII Feira do Viño de Quiroga.
14:00 h. Asemblea anual ordinaria da Confraría do Viño de Quiroga coa seguinte orde do día: Lectura e aprobación da acta anterior, informe do Presidente, estado de contas e rogos e preguntas.
14:30 h. Comida de confraternidade.
pregoeiro da feira do viño 2019
O pasado xoves 4 de abril, o Concello de Quiroga desvelaba o nome do pregoeiro desta edición. Como xa é costume, a estratexia mediática para crear expectación consiste en apurar ás últimas semanas para dar a coñecer o nome do/a elixido/a e dar por feito que este cumprirá con dous requisitos, ser unha cara coñecida da farándula e ter traballado no Grupo Mediaset.
Tras esa intriga creada, facíase oficial que o escollido era o actor Pablo Chiapella Cámara, coñecido principalmente por a interpretación de papeis como o de Amador Rivas, na serie de Telecinco “La que se avecina” ou o de Moncho Heredia en “Aquí no hay quien viva”.
Chiapella é diplomado en maxisterio pero como lle tiraba o mundo artístico tirou por este camiño e diplomouse tamén en Arte Dramático. A decisión parece que foi acertada pois a día de hoxe conta xa cunha longa traxectoria como actor, monologuista e presentador na canle temática Paramount Comedy e tamén en Antena 3, TVE e Telecinco.
Pertence ao denominado “Cuarteto de Albacete”, un grupo de humoristas manchegos da “quinta dos Chanantes” que formou con Joaquín Reyes, Ernesto Sevilla e Raúl Cimas. Un dos traballos de éxito máis recentes que fixo foi presentar o programa “El paisano” en La 1 de TVE.
Atrás quedan aqueles anos nos que o pregón non estaba centrado en figuras famosas do panorama televisivo e dan fe diso os nosos compañeiros de Diario de Quiroga cunha interesante ‘historia do pregón da Feira do Viño’.
