Este venres pola tarde levouse a cabo a entrega de galardóns da XXVIII Edición dos Premios Ribeira Sacra, un evento organizado polo Consello Regulador da Ribeira Sacra en colaboración co Concello de Monforte de Lemos.
Nesta edición participaron 67 viños de 24 adegas, 23 deles tintos, 18 brancos e 26 na categoría outras anadas. O proceso de selección dos viños gañadores levouse a cabo mediante unha rigorosa cata a cegas realizada en tres etapas. O día 17 procedeuse ao precintado dos viños, o día 18 tivo lugar unha precata e, finalmente, hoxe realizouse a cata final.
Nesta edición, premiáronse as mellores producións en tres categorías: tintos, brancos e outras anadas. Os galardóns distribuíronse do seguinte xeito:
Categoría Tintos:
- Ouro: Val da Lenda de Victor Manuel Rodríguez López
- Prata: Campaza de Casa Moreiras S.L.
- Bronce: Ciudaseis de María Gloria Alvarín Losada
Categoría Brancos:
- Ouro: Sollio de Juan Alberto Álvarez Rodríguez
- Prata: Don Bernardino de Don Bernardino S.L.
- Bronce: As Glorias de Amedo S.L.
Categoría Outras Anadas:
- Ouro: 4ª Generación Mencia Barrica 2020 de Don Bernardino S.L.
- Ouro: Regina Dona Godello Barrica 2022 de Regina Viarum S.L.
- Ouro: Prómine Singular Mencia 2022 de Bodegas Petrón S.L.
XXVIII Cata dos Viños da Ribeira Sacra entrega premios / CRDORS
O acto comezou coa entrega dos premios, elaborados pola olería de Gundivós. Unha vez entregados os premios, continuouse co cóctel para os asistentes, permitindo un espazo de convivencia e celebración dos éxitos obtidos.
O panel de cata desta edición estivo composto por sete membros do Panel de Cata do Consello Regulador, expertos no ámbito enolóxico: D. Bruno Lovelle Fernández, Dna. Maira Ratón Fernández, D. Xesús Verao Pérez, D. Luis Buitrón Barrios, D. Juan Angel Fernández Martínez, D. Julio Ponce Mouriño e D. José Antonio Fernández Somoza.
A Conselleira do Medio Rural destaca a calidade do viños da D.O. Ribeira sacra
A conselleira do Medio Rural, María José Gómez, acompañada polo delegado territorial da Xunta de Galicia en Lugo, Javier Arias, participou na entrega dos premios da XXVIII Cata dos Viños da Ribeira Sacra, onde destacou a calidade da Denominación de Orixe (DO) Ribeira Sacra e recoñeceu o traballo e a dedicación de todos os viticultores e adegueiros que diariamente “coidan e respectan o sector”.
Durante a súa intervención, a titular de Medio Rural trasladou os seus parabéns aos premiados e a todos os implicados na posta en valor da calidade desta DO. Nesta liña, fixo referencia aos dez indicativos de calidade que avalan a produción e características dos viños que se elaboran en Galicia e ao apoio que reciben por parte do Goberno autonómico.
A conselleira destacou a Estratexia de dinamización económica, territorial e turística das comarcas vitivinícolas de Galicia impulsada pola Xunta e as diferentes liñas de axuda para o sector que contan cun orzamento de máis de 10 millóns de euros neste 2024. As achegas destínanse fundamentalmente á reestruturación e reconversión de viñedo, á promoción en terceiros países e á elaboración e comercialización de produtos do sector, complementadas con axudas de fomento á calidade promovidas pola Consellería.
María José Gómez referiuse tamén á paisaxe dos viñedos. Neste sentido, destacou que se trata dunha paisaxe que queremos “seguir impulsado, a través dos viños, posto que esta paisaxe vitivinícola tamén xoga un papel predominante na candidatura a Patrimonio de Humanidade da Ribeira Sacra”.
XXVIII Cata dos Viños da Ribeira Sacra entrega premios / Consellería do Medio Rural
