O BNG considera necesario que nesta vendima de 2024 as axudas cheguen directamente ás viticultoras e viticultores afectados pola non recollida da uva. Lembran os nacionalistas, que o pasado 10 de setembro o Parlamento galego aprobou por unanimidade estas axudas, e “agora publícanse no DOG unhas axudas que exclúen a estes, seguindo coa política errada que nos trouxo ata aquí, que penaliza sempre aos pequenos” lembra Iago Suárez o Deputado chantadino do BNG que defendeu esta proposta no Pleno.
“Cremos que estamos nun momento crucial no que as administración deben protexer as iniciativas locais e pequenas que van ter maior dificultade de supervivencia, pero que son a marca da nosa tradición vitivinícola, e os verdadeiros artífices da paisaxe. Estes proxectos son fundamentais para a economía local porque alén de conservar e asentar poboación en idade activa, en especial no rural, favorecen de maneira clara a economía circular, que se precisa para combater calquera crise de venda sectorial, como parece acontecer co viño tinto” expón Suárez que non ve na publicación do DOG ningunha medida efectiva que poida amortecer o golpe económico desta campaña ás viticultoras, como era o compromiso do goberno galego.
Nesa liña, Suárez rexitrou varias preguntas para que o Goberno Galego explique por que non cumpre co votado, cales son os plans reais para a DO Ribeira Sacra, e empraza ao goberno galego “a cumprir co votado, polo tanto coa xente, que mantén a paisaxe” e insiste en lembrarlle á Xunta, a necesidade de actuar sen demora desde o Diario Oficial de Galicia.
