Nesta zona outorgáronse achegas aos concellos de Carballedo, Folgoso do Courel, Pantón, A Pobra de Brollón, Quiroga, Ribas de Sil, O Saviñao e Sober. Fináncianse sete actuacións para o funcionamento óptimo dos sistemas de abastecemento municipal,e as outras cinco axudas van destinadas á modernización e aumento da eficiencia e eficacia das instalacións de saneamento e depuración existentes, así como á construción de novas infraestruturas neste eido.

O límite máximo destas achegas, destinadas a concellos de menos de 5.000 habitantes é de 50.000 euros por actuación, sendo compatibles ambas liñas. De feito, na comarca obtiveron apoios para executar dúas obras -unha en cada apartado- os concellos de Folgoso do Courel, Quiroga, Pantón e Ribas de Sil.

No conxunto da provincia achéganse 2.124.500 euros para 52 obras en 37 municipios. E no que respecta a Galicia, Augas de Galicia destinapreto de 9 millóns de euros a 217 actuacións en 152 municipios.

Os incentivos, compatibles con outras axudas, subvencionan os investimentos realizados desde o 1 de xaneiro deste ano e inclúen, tanto os investimentos realizados na execución das propias obras, como os gastos asociados a elas en materia de actividades preventivas e accións de coordinación empresarial, de control de calidade ou de dirección dos traballos.