O vicepresidente da Deputación de Lugo, Efrén Castro, e as responsables da organización, Hita Gomez e Isabel Méndez, presentaron o pasado 7 de abril a XXII edición da Festa da Carne ao Caldeiro de Castro de Carballedo.
Esta celebración, de marcado carácter gastronómico, prevé servir máis dun milleiro de racións de carne ao caldeiro e de carne richada, receitas tradicionais que enxalzan a calidade da carne de vacún da zona e que, grazas ao impulso da asociación, se mantén como recurso de dinamización nesta parroquia de Carballedo.
O vicepresidente da Deputación valorou o traballo da asociación na organización desta cita que, segundo referiu, “ademais de amosar a gastronomía e outros recursos culturais do concello ás persoas visitantes, é punto de encontro e de recoñecemento para a veciñanza da parroquia de Castro e de todo o municipio”. Ademais, encadrou a colaboración da institución provincial coa feira como un “apoio da Vicepresidencia da Deputación ao tecido asociativo e cultural, que cumpre unha función fundamental na dinamización do rural”.
Ademais do xantar, e como atractivos engadidos para o vindeiro domingo, a Asociación de Veciños O Bubaiño convida a outras actividades. Unha delas é gozar, na contorna da praza, dun mercado de produtos locais e artesanía que contará cun total de 14 postos, e haberá outras de carácter divulgativo como son un roteiro e unha exposición. Para coñecer o patrimonio arquitectónico da zona organizarase unha ruta polas igrexas románicas do municipio, e para os amantes da fotografía poderase ver a exposición de fotografías antigas “Mulleres construíndo futuro” na Oficina de Turismo.
A ambientación musical no recinto feiral correrá a cargo da agrupación de música tradicional Falcatrueiros.
