Dende a formación política PSOE-Chantada consideran que as rúas da vila son o fiel reflexo da inacción, falta de iniciativa e desleixo do goberno municipal. 

Na vila, o pavimento da zona rodada e das beirarrúas precisan unha importante mellora, pero tamén comeza a ser necesaria unha renovación das redes de abastecemento e saneamento. Estas infraestruturas posúen unha notable antigüedade pois en gran medida están realizadas con materiais inadecuados, como por exemplo o fibrocemento. Ademais, o 90% das rúas están en mal estado ou presentan un avanzado estado de deterioro.

Desde a súa corporación consideran que esta situación contrasta cos recursos dos que dispón o actual rexedor. Ademais de maquinaria propia da brigada municipal, é destacable a inxección económica por parte da Deputación de Lugo a través do Plan Único. Se a todo isto se lle suman as aportacións da Xunta de Galicia e as inxentes contías que están a ingresar nas arcas municipais a través do IBI dos veciños, fan que sexa inexplicable a sitación de abandono das rúas da vida e dos camiños do ámbito rural.