O XXVI Concurso Internacional “Mondial des Vins Extrêmes 2018” organizado no Valle d´Aosta, Italia, premiou con 13 medallas ós caldos da Ribeira Sacra que se presentaron ó certame.
Deste xeito, a produción englobada na Denominación de Orixe Ribeira Sacra consolídase e acada gran recoñecemento no panorama vinícola internacional. 13 recoñecementos dun total de 720 bodegas participantes, provintes de 277 produtores de 19 países diferentes, das cales, 58 pertencen a bodegas da Ribeira Sacra.
Os viños premiados na categoría de brancos coa medalla de ouro son Almalarga, Viña Vella e Maga. Viña Garoña e Condado de Sequeiras, foron galardoadas coa medalla de prata.
No caso dos viños tintos, os que se levaron a medalla de ouro foron Viña Mezquita e Vía Romana. Val da Lenda, Regina Expresion, Estrela, Tear e Sabatelivs, obtiveron a medalla de prata nesta categoría.
Finalmente, a medalla de prata na categoría de viños tintos de 2015 e anos anteriores foi para o viño Almamadre.
A cerimonia de entrega de galardóns celebrarase o vindeiro 23 de setembro en Turín.
mondial des vins eXtrêmes
O Certame Mondial des Vins Extrêmes está organizado polo CERVIM (Centro de Investigación, Estudos, Protección, Coordinación e Valorización da Viticultura de Montaña) sendo o concurso enolóxico máis importante a nivel mundial, reservado para caldos producidos nas rexións de montaña ou procedentes da viticultura heroica (terrazas e terreos con máis dun 30% de desnivel ou altitude superior a 500 metros sobre o nivel do mar ou das pequenas illas).
Con este certame, dende o CERVIM preténdese promover e poñer en valor a produción enolóxica desas terras caracterizadas polas dificultades estruturais, pero tamén polos viños singulares que teñen unha personalidade extraordinaria.
O seu obxectivo é enfatizar as características únicas dos produtos así como dar a coñecer ós consumidores os aspectos culturais da viticultura de montaña e o valioso traballo que os bodegueiros fan para conservar o terreo e o medio ambiente e, de paso, que os consumidores poidan apreciar todo o traballo e esforzo que hai detrás de cada botella de viño.
