O delegado territorial da Xunta en Lugo, Javier Arias, desprazouse este 1 de xullo ata o enlace coa estrada LU-213 para comprobar o avance dos traballos que se están a realizar na vía de altas prestacións autonómica CG-2.1. As obras consisten no reforzo localizado do pavimento entre os puntos quilométricos 29+450 e 43+050.
Para iso programouse a realización de fresados nas partes da vía que o precisan e a reposición do firme con mestura bituminosa en quente. Posteriormente repintaranse as marcas viarias. Os traballos comezaron o pasado mércores, 29 de xuño, e está previsto que rematen a mediados de xullo aproximadamente.
A execución das obras afecta puntualmente ao tráfico, polo que está prevista a habilitación de carrís alternativos de circulación coa debida instalación de sinalización provisional cando sexa necesario.
IMPORTANCIA DAS OBRAS
A Xunta, a través da Axencia Galega de Infraestruturas, acomete directamente estes traballos cos medios de conservación de estradas da provincia de Lugo, co fin de reforzar a seguridade neste treito da CG-2.1, unha vía que conecta Monforte de Lemos co Alto do Faro.
Arias subliñou que o ano pasado rehabilitouse completamente o firme desta vía de alta capacidade entre Monforte de Lemos e Escairón (O Saviñao), dentro dun contrato de mellora de estradas da Zona Sur de Lugo dotado cun orzamento de 2 M€.
