O concello de Quiroga vai cambiar o equipamento urbano que se atopa máis deteriorado e aproveitará para darlle unha nova imaxe. Escolleranse algúns dos bancos cos que conta a vila para pintalo dunha maneira diferente, en alusión a unha data sinalada, un  personaxe, un lugar ou un produto (viño, aceite, mel) relacionado co municipio.

O goberno municipal aínda non determinou cantos serán os bancos que entren dentro deste proxecto, dependerá en boa medida do mobiliario urbano que precise renovarse e para o que se conta cun orzamento de  48.000 € con cargo ao Plan Único Provincial.

Esta nova imaxe, máis colorida nalgúns puntos da vila, quere ir acorde coa arte urbana, “Arte no ar”, que a través de murais de grandes dimensións locen nas fachadas da vila de Quiroga formando parte dunha nova ruta dentro do casco urbano.