O Concello de Quiroga dará a coñecer unha vez máis a magnífica calidade do mel que se produce no municipio este mércores día 10 de agosto cunha mostra que chega a súa trixésima primeira edición. A organización deste evento tan senlleiro ten por obxectivo a promoción dun dos produtos típicos da comarca que goza dun gran prestixio pola súa gran calidade e variedade.

Serán 5 os apicultores que este ano presenten o mel desta zona, deixando claro porque este produto comparte en Quiroga un lugar destacado, xunto co viño e o aceite. O recinto feiral para a venda de mel e outros produtos apícolas como xelea real, pole ou própole, instalarase desde primeiras horas da mañá pola rúa Real, nas inmediacións da casa consistorial.

A partir das doce da mañá a charanga “Lou Band” encargarase de amenizar o recinto feiral.

MEL AUTÓCTONO DE GRAN CALIDADE

Os colmenares situados nas zonas máis altas do municipio producen mel co predominio do castiñeiro, mentres que os situados nas zonas do val dan mel de brezo, planta moi abondosa e da que Quiroga. Nas zonas intermedias as abellas recollen o pole de castiñeiros e queirugas que xuntan con moitas outras flores dando un mel multifloral, grazas a gran variedade na flora deste territorio onde conflúen vexetación atlántica e mediterránea.

Tres variedades con matices diferentes en canto a cor, textura e sabor pero coa mesma calidade.