A celebración da XXIII Mostra do Aceite comeza a súa conta atrás, sendo o día de celebración o vindeiro domingo 14 de maio. Desenvolverase no lugar das Farrapas, en Bendilló, onde terá lugar a recreación da elaboración tradicional no muíño e onde se poñerán á venda diferentes aceites elaborados por colleiteiros de Quiroga.

Dado a coñecer o cartel, en vindeiras reunións da comisión organizadora seguirase perfilando o programa da mostra, un evento que está recoñecido como Festa de Interese Turístico de Galicia dende o ano 2014.

Ata o vindeiro luns 17 de abril mantense aberto o prazo de inscrición, lembrando a organización que o número de colleiteiros está limitado a 6, polo que os interesados e interesadas en participar serán seleccionados por orde de inscrición no rexistro de entrada das oficinas municipais. Os requisitos imprescindibles son contar co rexistro sanitario vixente e ter unha colleita mínima de 200 litros de aceite.