A alcaldesa de Triacastela, a popular Olga Iglesias, dixo que o seu concello “xa suspendeu” en novembro a licenza urbanística da empresa canteira que operaba na contorna da Cova Eirós.
O anuncio chega logo de que o Tribunal Supremo desestimase o recurso de casación presentado contra unha sentenza do Tribunal Superior de Xustiza de Galicia (TSXG) que anulaba esta licenza por atoparse nesta área rústica protexida.
En concreto, puntualizou a rexedora, trátase dun fallo do tribunal galego do “mes de novembro“, polo que o Consistorio “xa executou e suspendeuse” dita licenza. “A empresa tomará as súas decisións e entre outras cousas xa presentou no seu momento unha solicitude para un título habilitante que lle permite a Lei de Urbanismo de Galicia”, aclarou Iglesias.
De feito, e segundo dixo a alcaldesa, a compañía podería seguir traballando con ese “título habilitante” que lle concedeu a Xunta a través da Lei de Urbanismo de Galicia. Con todo, agora non hai persoal traballando nese lugar, porque a empresa mandounos á fábrica de Toral de los Vados, onde “si teñen un título habilitante que solicitaron desde 2018”.
