O Instituto Xeográfico Nacional (IGN) rexistrou un movemento sísmico de magnitude 3,4 cuxo epicentro se localizou no municipio de Láncara.

Segundo datos facilitados ao 112 Galicia polo Instituto Xeográfico Nacional, o terremoto tivo lugar ás 19,35 horas deste luns. Despois de producirse o tremor, o Centro Integrado de Atención ás Emerxencias de Galicia (CIAE-112) recibiu dúas chamadas pasadas as 19,30 horas de dous particulares residentes no municipio de Becerreá que aseguraban sentir o sismo.

Precisamente, segundo recolle o IGN, tamén se produciu un tremor de terra de magnitude 2,5 en Becerreá sobre as 19,41 horas deste luns a unha profundidade de 17 quilómetros.

Así mesmo, rexistráronse varios sismos en Triacastela entre as 19,44 horas deste luns e as 9,02 horas deste martes de magnitudes comprendidas entre 2,2 e 1,7, así como tremores de magnitude 1,8 e 1,7 en Folgoso do Courel e As Nogais, respectivamente.