Unha nova ponte no municipio de Láncara, sobre o río Sarria, dá servizo ao núcleo de Supena tras un investimento de 650.000 euros, executado pola Confederación Hidrográfica do Miño-Sil (CHMS).

O presidente da CHMS, José Antonio Quiroga, e o alcalde do municipio lucense de Láncara, Darío Piñeiro, visitaron esta infraestrutura que substitúe a unha ponte que presentaba un deficiente estado de conservación, con perigo mesmo da súa estabilidade estrutural.

Para a execución das obras foi precisa a formalización dun convenio interadministrativo entre a CHMS e o Concello de Láncara que posibilitou a redacción do proxecto e as actuacións de demolición da infraestrutura antiga, así como a construción da nova.

Nun comunicado, a Confederación explica que a nova infraestrutura “cumpre todos os requisitos establecidos no plan hidrolóxico vixente, maior sección e anchura e, por tanto, maior capacidade de desaugadoiro”.

Dispón dunha luz de 47 metros, con dous carrís de circulación de tres metros de anchura cada un e beirarrúa de dous metros.