A residencia Nosa Señora do Carme de Sarria notificou este domingo a detección dun gromo nas súas instalacións que afecta a 47 residentes e tres empregados, informaron o Servizo Galego de Saúde e a Consellería de Política Social.
Con este foco, o número de usuarios de residencias de maiores galegas con coronavirus elevouse este domingo a 466 (32 máis) ao rexistrarse 69 novos positivos e 37 altas.
Así o recolle o balance diario de casos elaborado polas Consellerías de Política Social e Sanidade, actualizado á última hora do sábado. Ademais do gromo de Sarria, engádense á listaxe outros once anciáns de DomusVi Carballo, seis da Vivenda Comunitaria Sampedro II da Merca, dous da Vivenda Comunitaria Sampedro (ambas no mesmo complexo), un en DomusVi Laraxe de Cabanas, un en San José de Arzúa e outro na Vivenda Comunitaria de Vilar de Santos.
