A Central Sindical Independente e de Funcionarios (CSIF), vén de denunciar a “alarmante situación das presas de categoría A da conca do Miño-Sil, cuxa rotura podería provocar danos moi graves á poboación e a servizos esenciais como auga, enerxía e comunicacións”.
Actualmente, a conca conta con dúas presas estatais de máxima categoría: a presa de Bárcena, en Ponferrada (León), e a presa de Vilasouto, no Incio (Lugo). Segundo advirten, esta última “só dispón dun técnico de instalacións hidráulicas, o resto do persoal dedícase a tarefas administrativas”, e engaden que “a insuficiente dotación humana compromete a vixilancia, o control e a reacción ante emerxencias”.
No que respecta ao persoal laboral critican tamén a subcontratación a empresas externas como TRAGSA, que encarece o servizo e xera un risco inaceptable para a poboación. Así mesmo, din ter denunciado dende hai anos a falta de persoal en Vilasouto ao haber unha praza vacante de técnico que leva anos sen cubrirse, e considerando esta cuestión “unha mala xestión deliberada por parte da Confederación Hidrográfica do Miño-Sil”.
FALTA DE INVESTIMENTO E SISTEMA HIDRÁULICO ENVELLECIDO
CSIF refire “décadas de abandono, falta de investimento e privatización encuberta de servizos estratéxicos do Estado. Os técnicos e operadores traballan en condicións de sobrecarga e responsabilidade extrema, sostendo un sistema hidráulico envellecido sen recursos suficientes”.
Alertan ademais de que esta situación concreta de Vilasouto é extensible ao conxunto de infraestruturas hidráulicas do país e que, segundo datos técnicos do propio MITECO, “reflicte unha realidade preocupante: 375 presas estatais presentan deficiencias, unha de cada tres necesita reforzos estruturais urxentes, o 65 % require renovación de sistemas de auscultación e vixilancia, o 50 % necesita rehabilitar os desaugadoiros de fondo, o 75 % carece de plans de emerxencia implantados, 147 presas tipo A están infradotadas de persoal para cumprir coas normas de explotación e o 95 % carece do persoal necesario para situacións de emerxencia e quendas de 24 horas”.
Ante esta situación, e no contexto climatolóxico actual de temporais atlánticos e borrascas consecutivas que deixaron precipitacións moi por enriba do habitual en Galicia, o sindicato esixe unha reunión urxente coa ministra para a Transición Ecolóxica para abordar a situación e tomar medidas inmediatas. De non activar solucións que garantan a dotación de persoal e a seguridade, dende a Central Sindical avisan que“iniciarán un calendario de mobilizacións para defender a seguridade das presas e a dignidade profesional dos empregados públicos que as sosteñen”.
