Este luns día 25 de outubro, o Concello de Sarria procederá ao asfaltado da Rúa da Igrexa e da Rúa da Esperanza da localidade de Oural, sempre que o permitan as condicións meteorolóxicas, producíndose cortes no acceso ás mesmas. A Policía Local acordou, co CEIP Antonio Fernández López, recolocar unha parada de autobuses eventual establecendo un protocolo para que os nenos e as nenas accedan ao centro con todas as garantías de seguridade.
O mesmo día 25 comezarase o asfaltado das rúas Matías López e Benigno Quiroga na vila de Sarria. O tempo estimado para a execución das obras é de 7 días.
COMO LLE AFECTA Á CIRCULACIÓN?
Por mor das obras de asfaltado en Sarria procederase ao corte de vías principais. A Policía Local elaborou un plan alternativo para circular polas rúas de Sarria. Na Lu-546, entrada Monforte de Lemos a Lugo, desviarase o tráfico pola Rúa Castelao, mentres que na Lu-546, entrada Lugo a Monforte de Lemos, desviarase o tráfico pola Rúa Xela Arias e Rúa das Insuas.
O acceso ás rúas afectadas polas obras estará prohibido, habilitando circulación para o uso exclusivo dos veciños, e para desprazamentos fóra de Sarria, recoméndase a utilización de vías do arrabalde do centro urbano, como o corredor CG 2.2.
Para calquera aclaración relacionada coa mobilidade dentro do centro urbano de Sarria o concello aconsella poñerse en contacto coa Policía Local no teléfono 982 530 850.
MELLORAS NA PISCINA E COMEZO DE CURSOS
A piscina climatizada conta xa cunha nova iluminación que incorpora a tecnoloxía LED que produce unha luz máis nítida, favorecendo a práctica das actividades deportivas acuáticas. Con esta mellora gáñase en seguridade dos usuarios e auméntase a eficiencia enerxética.
A área de Deportes do Concello anuncia tamén a posibilidade de apuntarse aos cursos que se ofrecen na Piscina Municipais: Cursos para meniños/as, iniciación de adultos/as e nenos/as e Aquayim.
O prazo para inscribirse será do luns 25 ao mércores 27 deste mes de outubro. O teléfono de atención ao público para aclarar dúbidas e anotarse é o 982 535000. Se houbese máis solicitudes que prazas farase un sorteo o xoves 28.
