O Xulgado do Penal número 1 de Lugo suspendeu este xoves o xuízo previsto contra un home acusado de insultar e propinar unha patada a un médico no Punto de Atención Continuada (PAC) da localidade de Sarria ao non comparecer o imputado nin constar como citado por atoparse en paradoiro descoñecido.

A vista, á que si acudiron testemuñas presenciais dos feitos, dous axentes da Garda Civil, o sanitario presuntamente agredido e unha enfermeira do citado centro hospitalario, foi sinalada novamente para o próximo 23 de febreiro. O Ministerio Fiscal solicita para o acusado unha pena de 18 meses de cárcere e tres meses de multa por un presunto delito de atentado contra funcionario público en concurso cun delito leve de lesións.

Os feitos que deberán ser xulgados tiveron lugar a madrugada do 20 de xuño de 2021 na localidade de Sarria. En base ao recolleito no escrito fiscal, o acusado, un mozo de 21 anos,persoouse no Punto de Atención Continuada do municipio en compañía da súa parella sentimental, que se atopaba enferma.

Un facultativo requiriu entón ao home que se puxese a máscara para permanecer no interior do centro, ao que este respondeu proferindo insultos ao sanitario e propinándolle unha patada na perna. Ante a actitude agresiva do imputado, recolle o escrito fiscal, o médico viuse obrigado a encerrarse con chave na súa consulta, “momento en que o acusado comezou a dar reiteradas patadas á porta”. Os feitos, entende a Fiscalía, son constitutivos dun delito de atentado contra funcionario público polo que se solicitará unha sentenza condenatoria de 18 meses de cárcere.