O deputado de Rural e Mocidade, Daniel García, coñeceu no CEIP de Samos, as melloras realizadas nos espazos exteriores do centro co apoio da Vicepresidencia da Deputación de Lugo. Acompañado pola alcaldesa de Samos, Chus López e por familias do centro, o responsable provincial comprobou o resultado das actuacións, como a ampliación do parque infantil, no que se instalaron novos xogos, a creación dunha aula ao aire libre e o acondicionamento dun horto.
A alcadesa de Samos explicou que “ a renovación do parque con novos xogos creou un espazo máis inclusivo, para todas as nenos e nenos” e destacou as posibilidades “da nova zona verde, con parrais e bancais para ter un horto onde aprendan a cultivar e estar en contacto coa natureza”. Tamén valorou “a colaboración e implicación da asociación de nais e pais que continuamente achegan ideas e iniciativas para dinamizar o colexio”
Daniel García destacou “o interese que o Concello nos trasmitiu en atender estas demandas da comunidade educativa” e subliñou que “especialmente nos concellos rurais, nos que temos o desafío constante de manter a poboación, atender as necesidades da comunidade educativa, pola que pasa o futuro”.
A área de Mocidade destinou 18.000 euros ás obras deste centro, que o ano pasado celebrou o 40 aniversario e que conta cunha trintena de alumnas e alumnos de infantil e primaria, incluídas as nenas e nenos da Casa Niño, que tamén emprega as instalacións.
Colexio de Samos / Vicepresidencia Deputación
