Esta obra infantil conta a historia de Paquiño, o primeiro raposo que se fixo aviador e que foi, probablemente, o mellor de todos cantos houbo e haberá entre os que saben voar sen avión e sen motor. Despois de moito afociñar, aprendeu a tomar voo e a aterrar como os avións e os helicópteros. E tamén aprendeu a amarar, que é como se di cando se pousa no mar. Un día Paquiño quixo voar ata cruzar a liña do horizonte. E foi. E ben que o pasou!
Na presentación, o autor, Antonio Reigosa, estará acompañado da ilustradora, Laura Cortés e do mestre e escritor Fran Bouso, paisano do primeiro pero afincado dende anos na cidade do Cabe.
Antonio Reigosa (Zoñán, Mondoñedo 1958) é escritor, investigador e divulgador da nosa cultura popular. Cronista oficial de Mondoñedo. Traballa como responsable de Comunicación e Xestión Cultural da Rede Museística Provincial de Lugo. Cofundador de Chaira, grupo de Investigación Etnográfica, ten participado en proxectos de investigación sobre literatura oral. Tamén é coautor, xunto con Xosé Miranda e Xoán Ramiro Cuba, do “Dicionario dos Seres Míticos Galegos” (Xerais 1998) e dos vinte volumes dos contos da colección Cabalo Buligán (Xerais 1998-2003) recollidos da tradición oral. Así mesmo, é coautor dos volumes “Contos colorados. Narracións eróticas da tradición oral galega” (Xerais 2001), “Pequena mitoloxía de Galicia” (Xerais 2001), “Cando os animais falaban” (Xerais 2002), “Arrepíos e outros medos” (Xerais 2004) e “Antoloxía do conto galego de tradición oral” (2002). Xunto coa ilustradora Noemí López, publicou os álbums “Guía ilustrada da Galicia invisible” (Xerais 2010) e “Trece noites, trece lúas. Libro das marabillas do Nadal” (Xerais 2011). Como autor de literatura infantil publicou: “Memorias dun raposo” (Xerais 1998), novela, Premio Merlín; “Resalgario” (Xerais 2001), novela, Premio Raíña Lupa de literatura infantil 2000; “O galo avisado e o raposo trampulleiro” (Xerais 2003); “Bacoriño” (Xerais 2004); “O aprendiz de home do saco” (Xerais 2013) e “O raposo aviador que voa sen motor” (Xerais 2019). En 2014 preparou a edición de “Galicia Encantada. O país das mil e unha fantasías”, e xunto con Antonio García Teijeiro publicou “Lendo lendas, digo versos” (Xerais, 2015), Premio Gala do Libro Galego 2016 (Iniciativa Bibliográfica) e Lista de Honra do IBBY, 2018.
Laura Cortés (Laura Recarey Cortés) naceu en Chantada en 1982. É titulada en Deseño Gráfico pola EASD Pablo Picasso da Coruña (2008) e ilustradora autodidacta, con formación en pintura realista cos artistas Xavier Muíños Ínsua e Jaime Valero Perandones. Dende 2011 leva a cabo ilustración e gráfica de proxectos educativos con difusión escolar para empresas da administración pública a través de axencias de comunicación (sector cultura, educación medioambiental, fomento do galego…), e libro de texto editorial.«O raposo aviador que voa sen motor» (Xerais 2019), de Antonio Reigosa, é o seu primeiro libro infantil ilustrado.
