O Concello de Monforte de Lemos vén de anunciar a 21ª edición de Artelemos, que terá lugar entre os días 3 e 7 de agosto. Esta mostra de artesanía contará 24 postos nos que mercar produtos de coiro, lá, cerámica, orfebrería, cestería e olería de Gundivós, entre outros.

Os visitantes que se acheguen ata este evento poderán, ademais, ver en vivo a elaboración das pezas dos artesáns, xa que haberá exhibicións do labor que estes fan. Tamén os máis cativos poderán desfrutar de Artelemos, dado que se organizarán diversos obradoiros dirixidos a rapaces.

Os postos abrirán pola mañá de 11:00 a 14:00 horas e en hoario de tarde de 18:00 a 22:00 horas. Aqueles artesáns que estean interesados en participar poderán cursar as súas solicitudes a través da web do Concello ata o vindeiro día 25 de xuño. Cada un deles contará co seu propio stand, dotado de tarima, iluminación e rotulación promocional propia.