Sarria acolle un ano máis o gran espectáculo de humor que a empresa de representación sarriana Etiqueta Negra organiza coa colaboración económica do concello na Praza da Vila o propio día de San Xoán ás 21:00 h. Polo escenario do “recuncho da comedia” xa pasaron artistas galegos como Xosé A. Touriñán, David Amor, Miguel Lago, Javier Veiga ou Ledicia Sola entre outros.
Este ano, o trío de cómicos que chega á Praza da Vila é de auténtico luxo, Álex Clavero, Santi Rodríguez e Oswaldo Digón.
Álex Clavero, un vallisoletano ben apadriñado por JJ. Vaquero dende os seus comezos, pasou polo Club da Comedia e Comedy Central e na actualidade participa todas as mañás no Francotirarock de Rock FM.
Santi Rodríguez, o froiteiro máis famoso do país, chega por primeira vez a Sarria tras moitos anos triunfando por todos os platós e teatros de España.
Oswaldo Digón, o lucense afincado na Coruña é un dos cómicos galegos máis valorados da actualidade. Participa no programa Malo será da TVG e será o encargado de presentar a gala.
