O próximo domingo 28 terá lugar na Pobra do Brollón a presentación da novela Pillabán, pillabán, do escritor chantadés gañador do Premio Xerais 2019 Amador Castro. O acto celebrarase ás 19:00 na Casa da Cultura. O libro trata a historia de María Castaña, unha personaxe que ten as súas orixes na Pobra.

A pesar de que a expresión “O tempos de María Castaña” é amplamente coñecida, esta personaxe non o é tanto. Pouco se coñece da historia e a orixe desta muller e da súa vida na parroquia brollonesa de Cereixa. A importancia de María Castaña neste lugar é tal que os seus veciños incluso se atreven a sinalar a súa suposta casa. Foi o arqueólogo e historiador Xurxo Ayán, orixinario de Cereixa, quen guiou a Amador Castro a través da historia de María Castaña e a pouca documentación medieval existente. Alí, o escritor chantadés tamén puido coñecer de primeira man as historias dos veciños, que lle permitiron escribir Pillabán pillabán.

“María Castaña representa a rebeldía fronte aos abusos de poder que caracteriza aos guímaros”, comentaba o Concelleiro de Cultura da Pobra do Brollón, Ricardo Rodicio, sobre a protagonista desta novela.