Esta actividade de promoción é un proxecto posto en marcha pola Red de Juderías para visitar as cidades que conforman dita asociación, e Monforte de Lemos é a primeira parada no percorrido.
Co obxectivo de aproveitar ó máximo a visita deste grupo de profesionais da comunicación e difusión turísticas, o Equipo de Goberno do Concello de Monforte organizou unha intensa xornada de actividades que deu comezo pola mañá coa visita á Torre da Homenaxe e á zona de ámbito xudeu da cidade. Posteriormente visitaron o Colexio de Nosa Señora da Antiga, para coñecer a súa escaleira, o claustro, a igrexa e a pinacoteca.
Nesta visita, foron acompañados pola 1ª Tenente de Alcalde de Monforte, Gloria Prada, pola delegada da Red de Juderías, Marta Puig Quixal e polo técnico de cultura do Concello, Carlos Rodríguez. No percorrido, os xornalistas foron guiados polo investigador monfortino Felipe Aira, e na súa visita ós Escolapios polo seu director, Pablo Blanco.
Ó mediodía, a comitiva foi recibida polo Alcalde da cidade, José Tomé Roca, e a continuación degustaron un auténtico menú sefardí no Parador de Turismo de Monforte. O Alcalde aproveitou a ocasión para darlles a benvida á cidade e para explicarlles o importante patrimonio artístico, cultural e gastronómico da cidade e da Ribeira Sacra. Tamén aproveitou o encontro para obsequiar ós xornalistas cunha serie de volumes sobre a historia da cidade, a Ribeira Sacra, o Colexio dos Escolapios, e tamén a Guía Turística oficial de Monforte.
Pola tarde, continuaron a súa visita achegándose á Ribeira Sacra para visitar o Miradoiro do Duque e o Embarcadoiro Río Sil, así como a Adega Algueira. A continuación, retornaron a Monforte para chaegarse a descubrir o Museo das Clarisas, e concluiron a súa estancia en Monforte disfrutando dunha cata de viños da D.O. Ribeira Sacra no Centro do Viño.
Os días 3 e 4 de marzo, o grupo de xornalistas especializados continuará o seu percorrido por Galicia visitando ás outras dúas cidades galegas que pertencen á Red de Juderías, Ribadavia e Tui.
