A Deputación de Lugo colabora co labor e o funcionamento da Fundación Uxío Novoneyra a través dun convenio de colaboración de 16.500 €, que foi asinado o 7 de xaneiro polo Presidente da institución provincial, José Tomé Roca, e o representante da Fundación, Uxío Novo Rey.
O devandito convenio permitiralle á Fundación Uxío Novoneyra reforzar o seu persoal coa contratación de 3 técnicos a media xornada. Estes traballadores farán posible unha mellor aplicación dos protocolos Covid nos museos e responder á demanda de visitas guiadas da súa casa-museo.
A colaboración do organismo provincial con esta e con outras entidades e institucións culturais ten por obxectivo dinamizar a vida cultural na provincia para poñer en valor o patrimonio literario, patrimonial e cultural co que conta a provincia.
RECOÑECEMENTO RECENTE
A Fundación Uxío Novoneyra foi unha das entidades gañadoras na categoría ‘Lugo Cambia ao Turismo Lucense‘ organizados pola Deputación de Lugo. O Consello Provincial de Turismo premiou a súa dedicación e traxectoria profesional como institución, o desenvolvemento de accións innovadoras en materia de creación de produtos turísticos, o impulso de accións innovadoras e tamén o férreo traballo en prol da calidade turística.
