Teatreiras foi unha das quince compañías que participaron no circuíto de teatro afeccionado organizado desde a área de Cultura no 2020, unha convocatoria que se adaptou á situación sanitaria ofrecendo aos grupos a posibilidade de gravar a representación no caso de que a pandemia impedise realizar as actuacións con público.

A vicepresidenta, Maite Ferreiro, explicou que “propuxemos esta alternativa para animar aos grupos de teatro afeccionado a seguir coa súa actividade a pesar da incerteza sobre a situación sanitaria.  Para nós é prioritario que as asociacións e colectivos se manteñan activos porque son fundamentais para a vida cultural en parroquias, concellos e comarca”

“Por outra parte, estas gravacións tamén xeneran actividade e traballo para autónomos e pequenas empresas audiovisuais, un sector que tamén está a sufrir as consecuencias da pandemia”, engadiu a deputada de Cultura.

A obra, con guión da directora do grupo Francisca Abeledo, propón un achegamento á historia do teatro a través de personaxes femininos dos clásicos literarios, mulleres de ficción que compartindo o seu sentir, o pensamento e circunstancias reivindican a presenza femenina dentro do teatro. A representación, na que interveñen 14 actrices, conta con preto de 500 visualizacións.

Teatreiras, que ten a súa orixe nos obradoiros de teatro para persoas maiores que organizaba o concello monfortino a finais dos anos 90, comezou a tomar parte no programa de teatro afeccionado Buxiganga en 2015, estreando cada edición unha nova obra.

Accédese á obra desde aquí.