Aproveitando o Día das Letras Galegas, librerías de Monforte aproveitarán para ofrecer diferentes actividades literarias.
No caso da Librería Agrasar, abrirá de 11:00 a 14:00 h. e ofrecerá un desconto do 10% na adquisición de libros en galego, alongando ao martes 18 esta mesma oferta. O luns 17 de maio estará presente en horario de 12:00 a 14:00 h. a escritora de Gundivós, no Concello de Sober, Moncha Prieto, que asinará exemplares do seu libro “Alma de Barro. Relatos da Ribeira Sacra”.
Un libro que promete e que foi prologado polo prestixioso e histórico catedrático de Filoloxía Románica, Galega e Portuguesa na Universidade de Barcelona, Basilio Losada.
Anticipo do prólogo que aparece na páxina web da Editorial Xerais:
“Ao ler Alma de barro. Relatos da Ribeira Sacra, tiven a impresión de que apreixaba nas mans un libro dun valor impresionante. O idioma é espléndido. Poucas veces lin un galego tan puro, tan perfecto. Unha obra merecente de converterse nun clásico en galego. Unha obra que non podía permanecer agochada, que ten que saír á luz. É unha impagable homenaxe á terra, ás fermosísimas paisaxes da Ribeira Sacra, pero tamén á obra humana, á recuperación do labor dos devanceiros e sobre todo da lingua. A lingua na que expresaban as súas esperanzas, o seu desacougo, a súa idea da morte e da vida”.
Na Librería Pelayo, o mesmo 17 de maio, presentarase o libro “Elpis na Lareira”, do escritor do Courel, Jesús Alfonso Parada Jato. Será o seu segundo poemario, tamén publicado por Peruchela Edicións.
Foto: Librería Pelayo.
Un limiar que transmite a esencia das antigas lareiras e 24 títulos que nos achegan á memoria momentos cotiáns, árbores, animais e aveños dun rural galego moi presente en toda a obra.
O acto de presentación, que terá lugar ás 16:00 h., contará coa presenza do autor e retransmitirase en streaming polas redes sociais da Librería Pelayo. O aforo para este acto é de 10 persoas polo que os interesados e interesadas en asistir en directo terán que reservar praza.
Segundo refire a responsable da editorial: “é unha satisfacción poder colaborar na recuperación da nosa lingua e das nosas letras nunha data tan importante como é o 17 de maio, coa presentación dunha nova obra en galego”.
