Xabier Vizcaíno estará acompañado por Pachi Cruz (contrabaixo) e Sofía Fernández Souto (voz e percusión). Fiará as cancións a filóloga Patricia Sánchez Seoane. O concerto, organizado polo Concello da Pobra do Brollón, será na terraza do bar Avenida ás 20:30. A entrada de balde, previa reserva no teléfono 654 803 658.

“Neno de Monte” conta con cinco relatos que rescatou da lingua de seus avós e onde puxo as súas maneiras tamen como contador de historias. A estes relatos danlles abrigo seis cancións con tintes acústicos moi ben engraxadas e que contan historias de monte e de mar que foron creadas en “A Palleira”, o estudo de gravación que Xabier ten en Goo, no Incio, na Terra Brava de Anxel Fole.

O videoclip “Camiños” abriu a lata deste fermoso traballo e foi filmado tamen na Terra Brava, no Incio, entre o encoro de Vilasouto e a súa propia aldea de Goo.

O libro está ilustrado dixitalmente coa técnica chamada de “tramado cruzado”. Andrés Wolf foi quen a levou a cabo. Este artista colombiano colabora con Xabier xa desde o primeiro traballo.