Malia as dificultades que ofrecen as circunstancias actuais, botou a andar a exposición en homenaxe ao gran escultor sarrián Xosé Díaz Fuentes organizada polo Concello de Sarria e en colaboración coa Biennale de Sarria – AAC.. Faino cun ano de retraso e co obxectivo de conmemorar os dez anos do seu falecemento.

A inauguración tivo lugar o mércores 21 de xullo ás 20:00 h. na Casa da Cultura de Sarria (Rúa Marqués de Ugena s/n), lugar onde se poderá visitar ata o 31 de agosto.

A exposición deste artista, “fillo predilecto de Sarria”, amosará dez esculturas e uns trinta debuxos seus, algúns deles inéditos, ademais de doce obras de artistas amigos.

En palabras dos organizadores, “a través desta exposición, amigable e festiva, o recordo, a memoria e o espírito do gran creador de formas continuará axudando a coidarnos e a nutrir o noso pensamento”.