A programación para público infantil promovida pola Vicepresidencia da Deputación de Lugo chega este luns 16 de agosto a Carballedo co espectáculo musical Extra!, de Paco Nogueiras.
A actuación, organizada coa colaboración da Asociación Cultural O Bubaíño, será ás 18.00 horas no campo da festa de Castro e haberá entrada libre ata completar a capacidade do recinto. O lugar está habilitado dacordo coas normas de prevención fronte á Covid.
O ESPECTÁCULO
Trátase dunha proposta musical baseada no libro-cd do mesmo título, editado por Kalandraka Editora, que pretende achegar ás nenas e nenos ao mundo da prensa escrita e ao xornalismo. No espectáculo, as noticias cántanse e báilanse coa participación do público.
O músico e actor Paco Nogueiras explica que “Extra! é un “espectáculo concebido en época de pandemia, adaptado a realidade que nos tocou vivir, e pensado para que os nenos e nenas poidan interactuar e desfrutar desde as súas cadeiras”.
