Este domingo, 26 de setembro, ás 20:00 h no Edificio Multiusos terá lugar un concerto da Orquestra Vigo 430, espectáculo programado polo Concello de Monforte de Lemos dentro das actuacións do Xacobeo 2021-2022 da Xunta de Galicia, coa colaboración da Sociedad Filarmónica de Monforte.
O proxecto da Orquestra Vigo 430 nace no ano 2005, aínda que adquire a súa configuración definitiva a partires do 2014. O seu obxectivo principal é dotar unha formación orquestral profesional, constituída na súa maior parte polos máis brillantes expoñentes das novas xeracións de músicos galegos, así como por destacados músicos freelance do resto de España e do estranxeiro.
O proxecto persegue o achegamento da música clásica a novos públicos potenciais, así como ás novas xeracións de oíntes. O obxectivo de eliminar a barreira psicolóxica que, para gran parte da poboación, existe á hora de achegarse a un concerto de música clásica. No ano 2014 a orquestra recibiu o premio «Martín Códax» da música.
Programa para Monforte
- JUAN DURÁN: Variacións sobre “Rosa de Abril” (estrea absoluta)
- Turina. Oración del torero
- Dvořák Serenata para cordas
- Bartók. Danzas rumanas
Na actuación da Orquestra Vigo 430 en Monforte participarán 25 músicos dirixidos por Isabel Rubio sendo o seu solista ao piano Antonio Queija.
