“A lúa vai encuberta”, coprodución do Centro Dramático Galego (CDG) coa Casa Museo Manuel María e as compañías Incendiaria e A Quinta do Cuadrante, chega esta fin de semana á vila de Sarria. Concretamente á Casa da Cultura o domingo 5 de decembro ás 19:30 h.
A peza, dirixida por Tito Asorey, conta coa dramaturxia de Vanesa Sotelo e foi gañadora do II Certame Manuel María de Producións Teatrais.
SINOPSE, ELENCO E PRODUCIÓN
‘A lúa vai encuberta‘ céntrase na realidade galega e na loita incesante por conformar unha identidade propia. Nesa andaina ideolóxica atopamos o enfrontamento co noso pasado recente e as súas contradicións e tamén un discurso moitas veces silenciado que explica as razóns de porque o noso país ten trazos políticos, económicos e sociais de seu.
Mesturando as formas de teatro popular como a farsa e o musical con formas contemporáneas como o audiovisual e o teatro documento, a peza propón unha posta en escena dinámica, que ten como motor a recuperación e a reactivación da memoria para tomar conciencia crítica da realidade.
Partindo da mirada coa que Manuel María selecciona e ordena pasaxes da nosa historia para levar a nosa atención tanto sobre as forzas activas como as que foron ocultadas, a intención do proxecto é a de cuestionar o relato adquirido para, desde a experiencia vital, revisar os prexuízos, os tabús e os silencios que aínda prevalecen.
Conta con Tito Asorey, Melania Cruz, Davide González e Vanesa Sotelo como intérpretes. Tito Asorey tamén na dirección e Vanesa Sotelo na autoría da dramaturxia. Completan o equipo artístico Carlos Alonso, responsable do espazo escénico e vestiario; Laura Iturralde, da iluminación, e Davide González, da sonoplastia.
Xunto ao CDG, participan tamén na produción desta montaxe as Compañías devanditas, a Casa Museo Manuel María, a Mostra Internacional de Teatro Cómico e Festivo de Cangas a Deputación de Lugo –Área de Cultura– e o Concello de Sarria.