Este venres proxéctase no Ateneo Casino de Monforte o filme, O gran camiño, un documental que percorre as grandes rutas a pé do mundo. A proxección contará coa presenza dos seus directores, Alba Prol Cid e Raúl García.

O filme é narrado en primeira persoa polos seus directores, dous cineastas que deciden emprender unha aventura de miles de quilómetros a pé, percorrendo rutas como Pacific Crest Trail, un dos sendeiros máis extremos dos EEUU, o misterioso Camiño Inca a Machu Picchu, a ruta do Kumano Kodo entre grandes templos xaponeses, e tamén o Camiño de Santiago.

O percorrido é unha viaxe máis profunda que explora temas universais como as fronteiras, o amor e o sacrificio pola familia, os conflitos sociais, a
espiritualidade, o cuidado do noso planeta ou o auto-coñecemento.
O gran camiño foi finalista a mellor documental nos XX Premios Mestre Mateo, e pasou por multitude de festivais de cine por todo o mundo.