Peruchela Edicións presenta “As Cinzas do Mencer” este venres no Ateneo Casino

Peruchela Edicións organiza, en colaboración co Ateneo Casino de Monforte de Lemos, a presentación, o próximo venres 19 de agosto ás 20:30 h, do libro de poemas "As Cinzas do Mencer". Será a estrea da voz poética de Gabriel Castro Vidal escritor de 28 anos procedente da Terra de Lemos.

“As Cinzas do Mencer” é unha poesía marcadamente galega con páxinas
adicadas á contemplación e interacción cunha natureza dinámica, case perfectamente superpoñible coa Physis total da que falaban os gregos.

Conta ademáis a obra con tres poemas adicados a tres dos corpos fluviais que integran a Ribeira Sacra, concretamente: o Sil, o Miño e o Loio.

A mirada serena do autor penetra nunha multitude de escenarios protagonizados por forzas alleas ao poder humano para transmitir con agudeza o xerme primixenio do misticismo pagán, no senso da percepción transcendente da forza e antigüidade presentes nos ciclos naturais.

Co decorrer das páxinas, As Cinzas do Mencer levaranos amigablemente da man polo mundo do poeta, tanto pola tanxente interna das reflexións e inquedanzas, como pola tanxente externa da contemplación abraiada de Galiza e os seus entornos.

Peruchela Edicións é unha editorial independente que nace en paralelo á Librería Pelayo de Monforte para apoiar, poñer en valor e visibilizar a obra de creadoras e creadores de Lemos e contorna.

Librería Pelayo de Monforte / XdL

DEIXAR UN COMENTARIO

Please enter your comment!
Please enter your name here