Unha das publicacións que presenta o autor é Entre o luceiro e a noite. Trátase dun poemario con ilustracións a cor do propio autor que acaba de publicar con Peruchela Edicións. Os seus versos describen o tradicional e preciso proceso de tornar a áspera cabeza da gramínea no alimento por antonomasia, unha ruta tantas veces percorrida recuperada para o lector mediante o verso comedido e a pormenorizada lembranza.

Aires de Meiraos, pola súa banda é un ensaio etnográfico no que recolle, como é habitual na súa obra, palabras e toponimia orixinal do Courel. Os
protagonistas da obra son os ventos de Meiraos e dalgúns lugares dos
redores. Aires que teñen grande influencia no medio, nos animais e nas
persoas, a nivel físico e tamén no eido psicolóxico.

Complétase a obra facendo referencia a distintos modos de nomear aos camiños, así como referencias ás herbas menciñais que te podes atopar neles. O libro saíu a venda a finais de setembro e foi editado pola Avant Editorial.